اتريدي دليل أكبر دليل انا / الشاعر فرج بالحمـــد

اتريدي دليل ايوريك لمعناة...وكيف الشقا..

وطول الرجا.. !خوذي الدليل اكبر دليل انا..

كم جرح عاند جرح...في خاطري المجروح

وكم ياس بكا فرح...وكم ظلم هز الروح

حتى الرفيق اللي عليه اعبيت..غاب ورحل سيبني

ونا كنت نحسابه انكان شكيت...وآن التعب يسندني

ولو عندك الوقت الكافي..نا انريد نحكي قصة

قصة ارياف اولافي...مش كيف اين قصة

قصة مضت من كم عام.. قصة غرام..بدا بالسلام

وبعدين اللقاء...حكاية غلا... يا دوبه بدا... مادام غير ايام.

احكاية اللي غاليته...ومن خاطري وديته...وما بين عيني ورمشها ذاريته

علي اعيون كل الناس...علي قهر ظلم الياس

ع القسم وع النصيب...ع الهجر والتعذيب

علي كل كلمة تجرحه...المهم لا ما ايغيب..!

فجأة..! اضايق علمي...وفجأة تلاشى حلمي...وغايب علي القيته

وين غاب... في اغيابه علي مليت

وين غاب... من شوقي عليه بكيت

ناديت يا غالي علي...راجيت نحسابه ايجي...نا قلت في طبعه وفي

ولا ما انهون عليه.!

حنيت للشوق الخفي...واسهيت والخاطر اسهي...مديت وبلهفة ايدي

القيته سراب ايديه

ومن وقتها لا جاني...لا طل لا عاود سأل

في غيبته خلاني...انراجي وما عندي امل

حاولت ننسى ونقسى...وانعده سحابة عابرة

دورت وين المرسى...اللي فيه الخواطر صابرة

جربت نعشق غيره...ونترك ادروب الحيرة

انسايس مناهل قاطري...وانهدي هواجس خاطري...وانحد من تفكيره

نلقا الخطاوي اتقودني....شور المكان ...اللي زمان..ايضمني

رغما علي اتقودني.. .هضاك الحنان...اللي بحضنه ضمنا

نلقى بقايا شمعة...يا ما ضوت ما بينا

ع الخد تنزل دمعة...كانت دليل حنينا

في هالمكان حكينا...وفي هالمكان شكينا

وفي هالمكان انضمت ع الوعود ايدينا

انعاود وشايل جرحي...ويا دوب تمشي خطوتي

وغابن مناير فرحي...من حسرتي وفي عبرتي

وعايش علي هالحال...ليا اسنين اطوال

ومازلت نرجى فيه

نحلم اني املاقيه

وعارف الملقى بيه

مش صعب...م المحال...!!

وهاضا الدليل اللي عليه حكيت...اللي غاب ما يعرف اني راجيت

ولا جا ولا جابه رجاء...كيف الشقا...واتقولي العنا

خوذي الدليل اكبر دليل انا...!