غناوي علم واعرة

غناوي علم واعرة

1 بعيبك لمن نشكيك ، خطيت يا مشاكي مواجعي
2 فواهق قدم يا عين ، عليك وين ما ناضن ابكي
3 عليه ميعدن ياسات ، خذن غلاي لا ديما طرد
4 سديت صوب مسدى ياس ، وحلت في مجاراة نيرته
5 تناير سداه وباد ، غلا عزيز من طول اجلته
6 مدوردين ع التقاز ، عرب عزاز ما راهم الا
7 اصحاب الغلا القديم ، رقوا غراضنا وين قابلوا
8 لطش امزان غيم غلاك ، نسوم الخطا وين قابله
9 لنظار يا عزيز بعدك ، القوت نوم ، وان ناضن بكا
10 نعدوا غلاك ربيع ، صاف وين هاوى رايده
11 حتى وانت بالك فيه ، صعيبة مناباة الغني
12 كلام الخلا مجحود ، ويا رفيق راك تعاوده
13 خزينة مغير جضار ، الخاطر غفر كاف اجهلي
14 حكام راطنوا باشات ، عساكر بلا مار سلطنة
15 قبل حوتهن جالن ، على جارهن اللي ما هو غني
16 علي كل ريح اذريت ، وحلت في مداناة صوبهم
17 العين مي بنار الناس ، تموج دوبها دوب نارها
18 خرب طباع العين ، عزيز وين ما غاب غوننت
19 لهم رسوم في الديوان ، عزاز غير زاحاهم جدب
20 نلوم خاطري ع الياس ، نلقاه شاقه سيل الغلا
21 خلاهن خلا واجداب ، خزاين بعد مال نفضن
22 شوي معارفك يا عين ، تريدي الراحة م الغني
23 خلاك ياسهم يا عين ، مكيودة تداني وتقصري
24 الياس ما يريد يدوم ، كذاب غير يوفي ف اجلته
25 طناها فراق عزيز ، العين غير ما فيدي لها
26 مضّايق بياس جديد ، يمشي خاطري فوق م النفس
27 اربوا خزين كاف العقل ، حساد وين ما ميره كثر
28 بلوله مغير دموع ، الخاطر عزا دار ع العلم
29 دعي العقل دانى ناس ، نشرت نارهم فيه لهلبت
30 كلاته علي ما فيه ، العقل يا علم نار الغلا
31 العقل نين راح عوين ، عليه نارهم وين قدعت
32 ثلاث دايلين طليب ، ع الخاطر تدوريد نارهم
33 العين شوقها مرهون ، نلقان ما الفاضي لاعها
34 تنماية اللي مفطوم ، علي عزيز عيني منمية
35 يزهى العقل كان فضيت ، ويضايق ان قالوا له غني
36 اللي بشيرة العقال ، ويا عين مبروك العلم
37 عليك بالعلم يا عين ، اظلاله عليك يروقن
38 بجيشه هجم في ليل ، الياس ما وعينا لغرته
39 داعي عليك فقي ، والا صاحب الدين لوّلي
40 مكتوب في غلاهم صار ، زعم خواتمه كيف يا علم
41 مفيت في ذراك يغفن ، لنظار يا علم طار نومهن
42 غيات العزيز عقار ، يبيدن ولا باد رسمهن
43 العقل وين جاه العيب ، ازاقن بوابيره رحل
44 ننهى العين ع المرهون ، تبات تايبة نين تنظره
45 انتي سبايبه يا عين ، غلا عزيز لولاك ما رسم
46 سيات في عقاب غلاك ، كْنسن يا علم قاعة الرجا
47 ملا العقل فاض عليه ، غلاك ما لقينا له وعا
48 ان جيتك يجيك الخير ، ويا عزيز نا ما ني جضر
49 ذبلن يا مشاكي العين ، بدريهن خطي زومة الرعد
50 لنظار من حرار النار ، ازاقن الا ما عيطن
51 بلاهن الله بالياس ، غيات كي تقادى نزلهن
52 مشى العقل تاجر صوب ، زطل عليه لا باع لا شرا
53 ذريتي مع لرياح ، ومع عزيز ما عون قابلك
54 تقاوى عطش لنظار ، وكفي الحوض وان ورودهن
55 الدمع يوم ياس عزيز ، لو كان غيث لوطان ارجعن
56 العقل وين جاه نباك ، سرى لك ونا جيت لاحقة
57 حتى والمواير ياس ، مرجى غلاك قانون يا علم
58 ادّاير سماهم غيم ، بعد اجداب ناياته جرن
59 العين فالتة م العقل ، تسّارق بلا مار شورهم
60 شرهان خاطري ***اك ، يعشم فيك لو ما تعاونه
61 حدود درت نا والياس ، رقاهن وجا جاير عليّ
62 غلاك عظم كسره قند ، جبّاره شكى قال كادني
63 لها عزيز غير بعيد ، العين في رجا صوبه جزت
64 سفا رديم ع النيران ، العقل وين ما فيهين وحل
65 حتى لو بنوا له ساس ، عزيز فاهقه ما له ذرا
66 مغاويض غير دلال ، وانت عليك نابيهن يْجَن
67 نهوا العقل عاند جال ، على غلاه ما ياس قادعه
68 ان زال الشعير شعير ، حقا عليه لو جاد الولي
69 بلاه يكرهوك الناس ، خصص المال كي طولت المرض
70 متّاليات فقر وياس ، ع العين يا علم نين تالفة
71 يشيطن على غفلات ، معانا لهاليب نارهم
72 لفى لك مرض يا عين ، بعد عزيز ما ليل ترقدي
73 ايام ياس مكتوبات ، يزولن ونا طايع لهن
74 تما طليب للنيران ، بعد ما قنى بوق خاطري
75 كواني عزيز بنار ، وفي عقابها ياس دار بي
76 حايزات زول عزيز ، مسارب حجوفه ظلّمن
77 العقل جاوراته نار ، كلت مخازنه بات ع الجلا
78 بعد معاهدة وآمان ، عزيز خاني خونة عدو
79 ربيعك اللي منـزول ، مصيف قاعته خير م العفا
80 عليك بالعلم يا عين ، حقا ان غاب تبقي به علم
81 حقا لو بكن مي عيب ، عل عزيز في وان الجضر
82 خلاك العلم يا عين ، دريخة بلا عون حايسة
83 صعيبة مواراته ، غلاك جرح ف العين بيدها
84 سيات يا عزيز خطاك ، كثر عدادهن نين الّفن
85 علي لصيف ما يرويك ، اصحي را يداعيك النظر
86 حسبت خاطري ناسيه ، خطر عزيز جا نايض لكل
87 ان غارت تغير بيان ، وان غالت تغاليهم عَنَد
88 يعلن في هذوب العين ، غلا عزيز لا ياس راقه
89 حلم منام جابك فيه ، غفا العقل لو كان ما وعي
90 جعن مقامهم في نار ، كدّوا هناك يا عين ياثموا
91 ظلاّم ما عليهم لوم ، صليبة الخطا شايلينها
92 رقّيتي عزاه انهال ، ويا العين منّه تاثمي
93 هضول هم اللي يا عين ، دروك ع الخطا كادك لهم
94 ليش ترقدي في الليل ، اللي في عقابه تسمري
95 الكبد من صهيد النار ، ملهوف جنبها يا نويرتي
96 صهيد نار جا بلهون ، من حاش وسطها ناجي شوي
97 العين ع الضلال تتوب ، ان طالت عرب في شوقها
98 صعبوا يا العين عليك ، وما لهم سبب بيش يقسموا
99 ان رادت غلا تبيه ، العين يا علم هي الرايدة
100 شقيت والشقا مكتوب ، ورا عزيز يا ريته قسم
101 تدير للغني موّال ، العين من ضلالات رايها
102 مكتوب في عقاب غلاي ، يصير ياس ما له مراجعة
103 يستاهل عزيز القدر ، علي صوبنا عاند عَنَد
104 العقل مو بلاش معاك ، اللي ان غبت غونن يا علم
105 مريض كل يوم يغَلَب ، قاسي ويالاه الدّوا
106 ان راعت مغار تغير ، عزاز نارهم كيف العدو
107 تديره يجيك يجيك ، القدر يا علم كيف السلف
108 مقعد معاهم يوم ، ويا فقي يسوى قرايتك
109 هفّوا عليه ناض خليع ، العقل وين ما نومه حلي
100 خليت يا عزيز الياس ، طحن الحيط مونة للجضر
111 غلاهم بقي للعين ، خيال يا علم في نومها
112 يا عزيز صبارات ، لنظار غير جا كيد حملهن
113 الصبر يا العين طبيب ، شكواك م الغلا زادك مرض
114 يتّاوق مع لجناب ، بعد عزيز يانا فاهقي
115 الياس وصغا ليّام ، العقل يا علم حار بينهن
116 ما لك عليه ملام ، العقل راك يا ياس ظالمه
117 مفيت والعزيز رفيق ، العين ما علي موح قادرة
118 العقل شال ياس عزيز ، صليبة وهو مو قادره
119 عليك مو صليبة كيد، ان غابن اقداره يرتحل
120 يريد من يروف عليه ، قزون خاطري نوعه نصب
121 خلينا قبال الناس ، نديرو خطا بيش يامنوا
122 نسيهم بلا ياسات ، العقل دار به ياس باعده
123 ينساهم يجوه منام ، عزاز خاطري والع بهم
124 العقل وين جاه نباك ، سرى وفاتني جيت لاحقة
125 كسي ضباب كيف الليل ، طمس غلاي واراه يا علم
126 كنيب تاجدي غرات ، حذا عزيز يا عين ذوني
127 ان ناوض العين سمرت ، غلا عزيز كي عود الرمد
128 غليوا عليه لولا الياس ، الخاطر لقي ناس يا علم
129 ما تلوم ع البكّاي ، العين نار لولاف قايسة
130 بين الحيا والموت ، خلوا العقل لولاف يا علم
131 عزيز وين صار الموح ، معاهم بقي عين شامتة
132 ان تارك العقل يضيع ، وان جال ما لقي غير العدو
133 حصل الراي فيد العين ، عمدت غوش لولاف شوهنت
134 تروج من قرار العقل ، عزيز لوعته ماي مابية
135 خبط شبوب بدري صيف ، نواره سبق ماه يا علم
136 فرّاق الزها ع الناس ، نسي العين ما جا شورها
137 ضليته وضل وراك ، الخاطر اللي كان عاقلة
138 خلاك حايرة في الراي ، غلا عزيز يا عين هو اللي
139 ايام الزها القديم ، يعودن اخرَى مي مقابلة
140 ان صادك صغا واريه ، يزول كيف ما زال الزها
141 نوطى عليه يبان ، غلاك نار ظلمة يا علم
142 حتى بصبر داويناه ، عصى جرح لولاف ما بْرِي
143 شديد عزم في ما فات ، واليوم خاطري طاب ع البكا
144 نحسابه مغير ايام ، تما سنين يا عين ياسهم
145 الخاطر شديد العزم، بكوه نين نايوا لدمعته
146 عليهن ندوس بعزم ، لنظار نين ع الياس يالفن
147 مفيت وانت ضامن داه ، العقل يا علم لا تساوله
148 حتى ان راجعوا ما راض ، الخاطر مضى فيه ياسهم
149 سقيته وهو عطشان ، خذيت أجر حاييت خاطري
150 غنم الياس راضن فيه ، ربيع الغلا وين ما طهق
151 حتى لو طْري ما صار ، بعد غلاك ما زول يالفن
152 ننسى سريبهم ما بيت ، ولا نصيب لولاف جابهم
153 ساسوا غريق العقل ، لقيوا بْحره طامي كادهم
154 عيّاط في فريق العقل ، يومي بنار لولاف القدم
155 تقول شايطات اليوم ، غيات يا علم باد جيلهن
156 براريم ساس العقل ، وراك يا علم راجن الكل
157 بعد اشرافته ع الموت ، سبحان اللي عاش خاطري
158 جضر الناس بالساعات ، ونا حذاي باني خيمته
159 لاحظ ايام دلال ، الخاطر هبيل يريدهن
160 غيات في كلف مرهون ، عيّاط ياسهن ديما يجي
161 عارف انكن في كيد ، م الياس غير ما فيدي لكن
162 ما نلوم ع البكّاي ، عندي عين يا ما باكية
163 نعدوا غلا لولاف ، ربيع مارسه خان يا علم
164 ان داجى يبات سفيه ، وان كافى السية توجعه
165 علي غيرهم ما سال ، الدمع يا علم حاجرينه
166 العقل ما لقي لغلاك ، برود يا علم فيت البكا
167 يعاود زها يا عين ، طرب الناس وانتي مغوننة
168 العين انعمت م الياس ، ويا رسيل لولاف قودها
169 واجد اللي في العقل ، مطمور ما شكينا به لحد
170 عزاز مالكين العقل ، ينساهم منامه يجيبهم
171 بلا جميلتك يا عين ، العقل زار لولاف ورجع
172 عقاير بساط العقل ، ملايا غلا نين بدّدن
173 تهاييت وانت بعيد ، رديت حال لنظار يا علم
174 ان زالن جلاوي العقل ، عامرات بمهاياتهم
175 سبب علته مرهون ، دوا العقل في قولة فْضي
176 بعلم يوم تزهى عام ، العين في رجا ناس طامعة
177 علي رجاك للولاف ، قلال عرف داروك ضالة
178 ان ما طالهم حيين ، الخاطر مراجي لاخرة
179 تقول في الغطا مكتوب ، يخطر عزيز ساعات نومها
180 زعمه يا نجوم الليل ، سمارة علي غالي لكن
181 حجر غلاه ينظر فيه ، العقل صاف يا لايمينّه
182 عزيز هو سبب لنظار ، عماهن وما بى يقودهن
183 عزيز للكفا ما هان ، وافعاله خطا واجعاتني
184 الخاطر التمن فيه ، ضياق علم ورياف وجضر
185 مغير قيلني م الياس ، عندي معاك ميعاد يا جضر
186 علينا ان كان تسال ، جضارى وفي هول يا علم
187 بعدك ما لفى للعقل ، رفيق ضابطة كيف الجضر
188 العقل وين قلنا تاب ، هفّوا عليه لولاف انتكس
189 العقل صوقرة مرهون والعين، ذايحة في جرته
190 عزيز لا عطاه القسم ، ولا العين صوبه ناسية
191 قزّون يا عزيز بعدك ، حتى وهلي يالاي كلّهم
192 عزيز وين ما نطروه ، يسيلن رقيقات الغرض
193 زهاكن عزيز وغاب ، كرهت يا مواهيم جيكن
194 تشريك في المفاصل جاي ، عزيز كسرنا فيه ما جبر
195 عارف العين تحوس ، للدار جيتي ما نريدها
196 فزعك يا العين عطيب ، مفيت دمع ما فيك فايدة
197 كدوها العين خطروا ، وهو الليل ما زال ف اوّله
198 وديتها العين براي ، لقطت راي غيري ضرّها
199 العين في زمان الموح ، تما حساب عامين يومها
200 برايا قبال الناس ، جروح في خفا يسّاطرن
منقــــــــــــــــــــــــــــــــــــــــــول

يسلمووووووووووووووووووووووو ايديك

يسلملك هالعقل الناير *** يامافيه خليط ثماير
شكرا لك أخيتي الفاضله على هذا الكوكتيل الرائع روعة حضورك الدائم ننتظر منك المزيد تقبلي تحياتي

» غناوي عالهـــــــــواي
» غناوي وحكااوي
» غناوي ع الكبد
» غناوي علم علي الخيانة
» غناوي العلم